ძლიერმა ქარმა დაღი დაასვა შეხვედრას. რა თქმა უნდა, უამინდობა ორივე გუნდს უშლიდა ხელს, თუმცა ყველაფერი შედარებითია და ასეთ დროს ის გუნდი უფრო კომფორტულად გრძნობს თავს, რომელიც მეტწილად ჩაშლაზეა ორიენტირებული, ვიდრე შექმნაზე.

მოკლედ, ვიტ ჯორჯია უტევდა, გაგრა კი თავს იცავდა - ასეთი გამოდგა მატჩის სიუჟეტი. ქარი ვიტ ჯორჯიას კომბინაციურ თამაშს აბრკოლებდა და ჩვენი გუნდი სხვა გზებითაც ცდილობდა გოლის გატანას - სტანდარტული სიტუაციებითა და მეტოქის საჯარიმოში თუ მის მისადგომებთან ძალისმიერი ორთაბრძოლებით.

აქტიურად მოქმედებდნენ გიორგი დათუნაიშვილი და გიორგი ბერიაშვილი, პირველ ტაიმში მათ არერთი პრობლემა შეუქმნეს მოწინააღმდეგეს. ვიტ ჯორჯია ფლანგებიდანაც ცდილობდა ჯებირების გარღვევას, მაგრამ ხან ქარი უშლიდა ხელს, ხან კი გაგრას მეკარე და მცველები მოქმედებდნენ რიგიანად გადამწყვეტ ფაზაში.

მატჩის მიწურულს ვიტ ჯორჯიას მასირებულ შეტევებს მასპინძლებმა ვეღარ გაუძლეს და ირაკლი კლიმიაშვილმა გამარჯვების გოლი გაიტანა.